देवचुली, चैत्र ६ । देवचुली १६ रजहरमा रहेको देवचुली कलेजको स्ववियु निर्वाचनको अध्यक्षमा लोकतान्त्रिक बाम गठबन्धनकी बेलिकुमारी बाचे मगर निर्वाचित भएकी छिन् । बाचेले अखिल क्रान्तिकारीबाट प्रतिनिधित्व गरेकी हुन् । बाचेले १ सय ३२ मत प्राप्त गरेर विजयी भएको देवचुली कलेजका स्ववियु निर्वाचन संयोजक भानुभक्त पौडेलले जानकारी दिनुभयो ।
उनका प्रतिष्पर्धी अनेरास्ववियुकी विद्या ढुङ्गानाले ९२ मत ल्याएर पराजित भएकी हुन् । सचिवमा बाम गठबन्धनकी सञ्जना सोडारीले १ सय १५ मत र कोषाध्यक्षमा बाम गठबन्धनकी निरमाया गाहा मगरले १ सय २७ मत ल्याएर विजयी भएका छन् । सचिव नेविसंघबाट र काेषाध्यक्ष अखिल (क्रान्तिकारी)बाट प्रतिनिधित्व गरेका हुन् ।
यसैगरि सदस्यतर्फ नेविसंघबाट ३ जना, क्रान्तिकारी १ र अनेरास्ववियुबाट १ जना निर्वाचित भएका छन् । गठबन्धनका सदस्यहरूमा दिपा श्रेष्ठ, विनोद गाहा मगर, निशान बस्नेत र उषा बुढाथोकी निर्वाचित भएका छन् भने सदस्यमा नै अनेरास्ववियुको तर्फबाट केशव सुनार विजयी भएका छन् । कलेजको समानुपातिकतर्फ नेपाल विद्यार्थी संघले ९९ मत प्राप्त गरेको छ भने अनेरास्ववियुले ८० र अखिल क्रान्तिकारीले ३७ मत प्राप्त गरेको छ ।
यहाँ नेपाल विद्यार्थी संघ र अखिल क्रान्तिकारी बिच तालमेल थियो भने अखिल नेपाल राष्ट्रिय स्वतन्त्र विद्यार्थी युनियन एक्लै थियो । क्याम्पसमा ३ सय ८३ जना मतदाता रहेकोमा जम्मा २ सय ४५ मत खसेको थियो ।