फाइनलअघि नेपाल र म्यानमारको शक्ति परीक्षण

नेपाल र म्यानमारले यसअघि नै उत्कृष्ट प्रदर्शन गर्दै फाइनलमा स्थान पक्का गरिसकेका छन् । म्यानमार समूहको शीर्ष स्थानमा रहँदा नेपाल दोस्रो स्थानमा रहेको छ ।

नेपालले किर्गिस्तानलाई १-० र लेबनानलाई १-० को अन्तरले पराजित गर्दै सेफ यात्रा तय गर्यो । दुवै खेलमा नेपालका फरक खेलाडीले निर्णायक गोल गरे । किर्गिस्तानविरुद्ध विमला चौधरीले र लेबनानविरुद्ध सावित्रा भण्डारीले गोल गर्दै नेपाललाई जित दिलाए ।

म्यानमारले समूह चरणमा कीर्गिस्तानलाई ३-१ तथा लेबनानलाई ५-० को फराकिलो अन्तरले पराजित गर्दै आक्रामक खेल शैली प्रस्तुत गरिसकेको छ ।

नेपाल र म्यानमार महिला फुटबलमा तेस्रो पटक आमनेसामने हुन लागेका छन् । यसअघि भएका दुई भिडन्तमा नेपालले म्यानमारलाई पराजित गर्न सकेको थिएन ।

सन् २०१८ मा ओलम्पिक छनोटको पहिलो भेट १-१ को बराबरीमा सकिएको थियो, भने सन् २०१९ मा नेपाल म्यानमारसँग ३-१ ले पराजित भएको थियो । ६ वर्षपछि हुन लागेको यो पुनःमुकाबिलामा नेपाल इतिहास उल्ट्याउँदै जित दर्ता गर्ने लक्ष्यमा हुनेछ ।