काठमाडौं । भारत र पाकिस्तानबीचको सीमा क्षेत्रमा फेरि एक पटक तनाव चुलिएको छ। दुबै मुलुकले एक–अर्कामाथि युद्ध विराम उल्लङ्घन गरेको आरोप लगाउँदै आफ्नो पक्ष प्रस्तुत गरेका छन्। पछिल्ला घटनाक्रमले दशकयताकै खराब अवस्था सिर्जना भएको सुरक्षा विश्लेषकहरूले जनाएका छन्।
भारतीय विदेशमन्त्री विक्रम मिस्रीले आइतबार भारत अधीनस्थ काश्मीरमा विस्फोटको आवाज सुनिएको पुष्टि गर्दै युद्ध विराम उल्लङ्घन भएको आरोप लगाए। उनका अनुसार पछिल्लो केही दिनयता पटक–पटक युद्ध विरामका नियम तोडिएको छ। उनले यसबारे भारतीय सुरक्षाबललाई जानकारी गराइसकेको बताएका छन्।
तर, त्यसको केही समयपछि पाकिस्तानी विदेशमन्त्रीले प्रेस विज्ञप्ति जारी गर्दै पाकिस्तान युद्ध विरामको पक्षमा दृढ रहेको स्पष्ट पारेका छन्। उनले उल्टै भारतले नै युद्ध विराम उल्लङ्घन गरेको आरोप लगाएका छन्। पाकिस्तानले संयमता प्रदर्शन गर्दै पहलकदमीका रूपमा स्थिति नियन्त्रणमा राख्ने प्रयास गरेको दाबी पनि गरिएको छ।
उल्लेखनीय छ, यो पछिल्लो तनाव २२ अप्रिलमा काश्मीरको पहलगाममा भएको आतंकवादी आक्रमणपछि चर्किएको हो। भारतले उक्त आक्रमणको प्रतिउत्तरस्वरूप सीमावर्ती क्षेत्रमा सैन्य कारबाही सुरु गरेको थियो। सो कारबाहीमा मिसाइल र ड्रोन प्रयोग गरिएको भारतीय दाबी छ। पाकिस्तानले भने उक्त हमलामा आफ्नो संलग्नता नभएको स्पष्ट पारेको छ।
यहीबीच अमेरिकी राष्ट्रपति डोनाल्ड ट्रम्पले सामाजिक सञ्जालमार्फत अमेरिका तथा अन्य मुलुकहरूको मध्यस्थतामा युद्ध विराममा सहमति जुटेको बताएका थिए। भारतीय पक्षले पनि सो सहमतिको पुष्टि गर्दै करिब तीन दर्जन देशहरूको कूटनीतिक प्रयासले युद्ध विराम सम्भव भएको जनाएको थियो। तर, त्यसको केही घण्टामै काश्मीर क्षेत्रमा पुनः विस्फोटको आवाज सुनिएको बीबीसीले जनाएको छ।
युद्ध विरामको घोषणासँगै केही आशा पलाए पनि पछिल्ला घटनाक्रमले पुनः अस्थिरता निम्त्याएको छ। विश्लेषकहरूका अनुसार यस्ता आरोप–प्रत्यारोप र सीमा क्षेत्रमा भइरहेका घटनाले दक्षिण एशियाली सुरक्षामा थप चुनौती पैदा गर्ने देखिएको छ।