ज्ञानेन्द्र शाह काठमाडौं फर्किँदा स्वागतसहित शक्ति प्रदर्शन गर्दै राजावादी, ठूला दलमा हलचल

राप्रपाका नेता-कार्यकर्ता र समर्थकहरु पूर्वराजाको स्वागतका लागि त्रिभुवन अन्तर्राष्ट्रिय विमानस्थलमा भेला हुने कार्यक्रम रहेको छ । विमानस्थलमा स्वागतपछि शाहलाई महाराजगञ्जस्थित निर्मल निवास पुर्‍याइनेछ ।

राप्रपाका प्रवक्ता ज्ञानेन्द्र शाहीले पूर्वराजालाई स्वागत गर्न सबैलाई आह्वान गरेका छन् । उनले सामाजिक सञ्जालमार्फत ‘फागुन २५ गते दिउँसो १ बजे विमानस्थलमा उपस्थिति जनाउन सबैलाई हार्दिक निमन्त्रणा गर्दछु,’ भनेका छन् । साथै, जोसँग जुनसुकै सवारी साधन भए पनि त्यसै प्रयोग गरेर उपस्थित हुन आग्रह गरेका छन् ।

हालै फागुन ७ गते प्रजातन्त्र दिवसको अवसर पारेर पूर्वराजा शाहले राजसंस्थाको पुनर्स्थापनाको विषय उठाएका थिए । त्यसपछि राप्रपासहित राजसंस्थावादी समूहहरूले आन्दोलनलाई तीव्रता दिएका छन् । उनीहरू चाँडै नै राजसंस्था फर्किने दाबी गरिरहेका छन् ।

यस विषयलाई लिएर ठूला दलहरूमा पनि चर्चा चलिरहेको छ । प्रधानमन्त्री एवं एमाले अध्यक्ष केपी शर्मा ओलीले राजसंस्था पुनर्स्थापनाको प्रयास नगर्न चेतावनी दिएका छन् । उनले फागुन २२ गते महोत्तरीमा आयोजित कार्यक्रममा ‘जनताले फालेको राजतन्त्रलाई फेरि कसरी फर्काउने ?’ भन्दै प्रश्न गरेका थिए ।

यसैबीच, नेकपा माओवादी केन्द्रले तराई-मधेस जागरण अभियान स्थगित गरेको छ । महासचिव देव गुरुङका अनुसार हालको राजनीतिक परिस्थितिलाई मध्यनजर गर्दै गणतन्त्र पक्षधर दलहरूसँग थप छलफल आवश्यक रहेको भन्दै अभियान केही समयका लागि रोकिएको हो ।

राजसंस्था समर्थकहरूको प्रदर्शनलाई लिएर सत्तारूढ दल नेकपा एमालेका नेताहरूले विभिन्न प्रतिक्रिया दिइरहेका छन् । शनिबार साँझ प्रधानमन्त्री ओली र राष्ट्रपति रामचन्द्र पौडेलबीच भएको भेटलाई पनि अर्थपूर्ण रूपमा हेरिएको छ ।

पूर्वराजा शाहले गण्डकी प्रदेशका विभिन्न मन्दिरहरूको दर्शन गरेपछि पोखरामा राजा वीरेन्द्रको शालिक अनावरण गरेका थिए । सोही भ्रमण सकेर उनी काठमाडौं फर्किन लागेका हुन् ।

यता, काठमाडौँमा सुरक्षा व्यवस्था कडा बनाउने तयारी सरकारले गरेको छ। नेपाल प्रहरीले १० हजार मानिस प्रदर्शनमा उत्रने अनुमान गरेको छ। सबै प्रकारका सुरक्षाकर्मी तैनाथ बनाउने सरकारको तयारी छ।