लैङ्गिक विविधता र तेस्रोलिंगी पहिचानको अस्तित्व बुझ्न ट्रम्पलाई नेपाल भ्रमणको निम्तो

अमेरिकी राष्ट्रपतिको दोस्रो कार्यकाल सुरु गरेका ट्रम्पको महिला वा पुरुष दुई लिङ्ग मात्रै हुने कार्यकारी आदेश दुराशयपूर्ण रहेको उनीहरूले बताए । मायाको पहिचान नेपालको कार्यालय काठमाडौँमा समुदायको अधिकारमा क्रियाशील संस्थाहरूले सामूहिक छलफल गर्दै भने,‘हामी हाम्रो समावेशी सम्पदाबाट सिक्न नेपाल भ्रमण गर्न निमन्त्रणा दिन्छौँ । सँगै, हामी हाम्रो पहिचान मेटाउने प्रतिरोध गर्छौँ, हाम्रो अस्तित्व मनाउँछौँ, र चुनौतीहरूको बाबजुद अगाडी बढाउन प्रतिबद्ध छौँ ।’

नेपालको लैङ्गिक तथा यौनिक अल्पसङ्ख्यक समुदायहरू, तेस्रोलिङ्गी, ट्रान्सजेन्डर, र नन–बाइनरी लिङ्गहरूलाई लक्षित गर्ने ट्रम्पको कार्यकारी आदेशको उनीहरूले कडा निन्दा गरे । ट्रम्पको भेदभावपूर्ण नीतिको सम्भावित विश्वव्यापी परिणामहरूमा उनीहरूले गम्भीर चिन्ता व्यक्त गरे ।

ट्रम्पको घोषणासँगै एचआइभीसँग बाँचिरहेका समलिङ्गी, तेस्रोलिंगी व्यक्तिहरूको लागि जीवन बचाउने एआरटी औषधिहरू सहित लैङ्गिक तथा यौनिक अल्पसङ्ख्यक अधिकारका लागि सञ्चालित कार्यक्रमहरूको कोष फिर्ता हुने चिन्ता उनीहरूको छ ।

यो कोष फिर्ता लिएर विश्वव्यापी रूपमा लैङ्गिक तथा यौनिक अल्पसङ्ख्यक विरोधी समूहहरूलाई प्रोत्साहित गर्न सक्ने चिन्ता उनीहरूले गरे ।

शक्तिशाली राष्ट्रका नेताका यस्ता दुराशय नीतिहरूले अन्य देशहरूमा विध्वंस निम्त्याउन सक्ने संविधान सभाका सदस्य एवं मायाको पहिचान नेपालका कार्यकारी निर्देशक सुनिलबाबु पन्तले बताए ।

ट्रम्पको यो नीतिले लैङ्गिक तथा यौनिक अल्पसङ्ख्यक समुदायले कडा सङ्घर्ष गरेर प्राप्त गरेका अधिकार र सुरक्षालाई खतरामा पार्ने पन्तले उल्लेख गरे ।

‘नेपालको लैङ्गिक विविधतालाई मान्यता दिने इतिहास छ, ६ लिङ्गको ऐतिहासिक सन्दर्भ र तेस्रोलिङ्गीको वर्तमान कानुनी मान्यता छ,’पन्तले भने,‘हामी हाम्रो पहिचान र अधिकार मेटाउने अनुमति दिन अस्वीकार गर्छौँ ।’

उनले अमेरिकी कूटनीतिक नियोगहरूलाई ट्रम्पको भेदभावपूर्ण नीतिहरू प्रवर्द्धन गर्नबाट टाढा रहन भनेका छन् । अन्तर्राष्ट्रिय सहयोगी सरकारहरू ९जस्तै युरोपियन युनियन, बेलायत, क्यानडा, अस्ट्रेलिया०लाई विश्वव्यापी रूपमा लैङ्गिक तथा यौनिक अल्पसङ्ख्यकको अधिकारका कार्यक्रमहरूमा आफ्नो समर्थन र कोष बढाउन आग्रह गरेका छन् ।

ट्रम्पको महिला वा पुरुष दुई लिङ्गलाई मात्र मान्यता दिने कार्यकारी आदेशको असर इन्टरनेटबाट देखिन सकिने अभियन्ता विवेक सुसलिङ मगरले बताए । फेसबुक, ट्विटर, इन्स्टाग्राम लगायतका सामाजिक सञ्जालमा लैङ्गिक तथा यौनिक अल्पसङ्ख्यक असुरक्षित हुने खतरा देखिएको उनले बताए ।

नेपालमा रहेको अमेरिकी दूतावासमा राखिएको इन्द्रेणी झन्डा हेरेर गर्व गर्दै आएको समुदायलाई ट्रम्पको घोषणाले चिन्तित बनाएको उनले उल्लेख गरे । सपोर्ट गर्ने व्यक्तिहरूलाई भ्रममा पार्ने ट्रम्पको अभिव्यक्तिको उनले आलोचना गरे ।

अभियन्ता एवं मायाको पहिचान नेपालका उपाध्यक्ष मधु केसीले ट्रम्पको घोषणा विध्वंस मच्चाउने खालको भएको बताए । उनले समुदाय चिन्तित भएको सुनाए । समुदायको अधिकारका लागि चलिरहेका अभियानलाई विरोधी अभियान चलाएर विध्वंस मच्चाउन सक्ने तर्फ सचेत र होसियार हुनुपर्ने अवस्था आएको उनले बताए ।

समानताका लागी आवाज नेपालकी रोजी पुनले ट्रम्पको घोषणाको सामूहिक प्रतिवाद गर्नुपर्ने बताइन । लैङ्गिक तथा यौनिक अल्पसङ्ख्यक समुदायको अधिकारका लागि सामूहिक दबाब दिनका लागि आफूहरू तयार रहेको सुनाइन